وہ درد عشق جو کہ گوارا نہ ہو سکا

 وہ دردِ عِشق جو کہ گوارا نہ ہو سکا

اس کے بغیر اپنا گُزارا نہ ہو سکا

تھوڑا سا ساتھ حاصلِ یک عُمرِ آرزو

اس کا ملال کیا کہ وہ اپنا نہ ہو سکا

تسکینِ جان و دیدۂ حیران مرحبا

پردا کسے کہ وعدۂ فردا نہ ہو سکا

جوشِ جنُوں کہ فُرصتِ آوارگی مِلی

اچھا ہُوا کہ لُطف دوبارا نہ ہو سکا

پُر کیف اس قدر تھا خطِ جادۂ خیال

دُوری کا رنج باعثِ ایذا نہ ہو سکا

تھی اتنی تیز شہرِ نِگاراں کی روشنی

سینے کا داغ، داغِ سویدا نہ ہو سکا

وہ ارتکازِ رنگ یہ سیلابِ رنگ و بُو

گُلشن حریفِ وُسعتِ صحرا نہ ہو سکا

ہم نقدِ جان و دل پئے میخانہ لائے تھے

پیرِ مغاں کا حیف اشارا نہ ہو سکا

رابعہ برنی