نظر بھر کے سوئے بیمارِغم دیکھا نہیں جاتا

نظر بھر کے سوئے بیمارِغم دیکھا نہیں جاتا

اکھڑنا ایک اک ہچکی میں دم دیکھا نہیں جاتا

خدا دشمن سے دشمن کو نا دکھلائے شبِ فرقت

مجھی سے اپنا چہرہ صبح دم دیکھا نہیں جاتا

محبت میں کچھ ایسے آنکھوں پر پڑ جاتے ہیں پردے

کہ وقتِ جذبِ دل دَیر و حرم دیکھا نہیں جاتا

یہ کہہ کر وہ اٹھے بالیں سے قربان اس بہانے کے

کسی بے کس کو ہم سے مرتے دم دیکھا نہیں جاتا

تعجب خیز عالم ہیں یہ دو عبرت کی تصویریں 

ہمارا ضبط اور تیرا ستم دیکھا نہیں جاتا

فقط اک قبر ہے آگے خدا کا نام اے محشرؔ

کسی سے حالِ اربابِ عدم دیکھا نہیں جاتا

محشر لکھنوی