کیا کہوں دل تو گرفتار بلا ہے اب تک

کیا کہوں دل تو گرفتارِ بلا ہے اب تک

کون دُشمن ہے جو اس گھر میں چُھپا ہے اب تک

کس کو الزام دوں اے بخت ستم گر تُو بتا؟

پُھول دے کر مجھے پتھر ہی ملا ہے اب تک

کون ہوں یہ نہیں معلوم؟ مگر ہوں موجود

اتنی ہی بات کا ادراک ہوا ہے اب تک

خار تو خار ہے کیوں اس کو اُٹھایا میں نے

اپنے ہی دل کی مروّت سے گِلہ ہے اب تک

ہو گئے مجھ سے جُدا سارے رفیقانِ سفر

اک فقط درد ہے پہلو سے لگا ہے اب تک

کوئی بدلا نہیں اس دورِ خِرد میں احمد

ایک میں ہوں کہ جسے پاسِ وفا ہے اب تک

الطاف احمد اعظمی