وہ آغاز الفت کا نازک زمانہ
خود اپنی حقیقت، خود اپنا فسانہ
بدل کر بھی بدلا نہ رنگِ زمانہ
بہار آتے ہی لُٹ گیا آشیانہ
سمجھ لیں اسے کاش اہلِ زمانہ
محبت حقیقت ہے، باقی فسانہ
یہ رازِ محبت بھی ہے کیا فسانہ
کہ ہم چُپ ہیں اور کہہ رہا ہے زمانہ
چمن ہو کہ صحرا، تلاشِ جنوں کر
مُرادوں سے ملتا نہیں آشیانہ
دلوں کا سکوں، زندگی کا سہارا
تِرا آستانہ،۔ تِرا آستانہ
مجھے کس قدر راس آیا ہے تسکیں
محبت کی ناکامیوں کا زمانہ
تسکین قریشی
No comments:
Post a Comment