مقتدی کے لوٹنے کو مقتدا ہو جائیے
رہزنی کرنا اگر ہو رہنما ہو جائیے
شیر کا جب سامنا ہو لومڑی بن جائیے
لومڑی کے سامنے خود بھیڑیا ہو جائیے
رنگ و روپ اپنا بدلتے رہیے پولیٹکس میں
لیڈری کرنا ہو گر بہروپیا ہو جائیے
پیچھے رہیے سب سے قربانی کا موقع آئے جب
جب بٹیں عہدے اچک کر پیشوا ہو جائیے
رخ ہوا کا ہو موافق، باندھیے اپنی ہوا
جب ہوا اکھڑے تو گلشن سے ہوا ہو جائیے
وضع سادھو کی بنا کر زن پرستی کیجیے
دیویوں کو پوجیے اور دیوتا ہو جائیے
جب گناہوں کی سکت ہی کچھ نہ پیری میں رہی
بہتر اب ہے مان پوری پارسا ہو جائیے
انجم مانپوری
نور محمد
No comments:
Post a Comment