لذت شام شب ہجر خدا داد نہیں

لذتِ شام، شبِ ہجر خدا داد نہیں
اس سے بڑھ کر ہمیں رازِ غمِ دل یاد نہیں
کیفیت خانہ بدوشانِ چمن کی مت پوچھ
یہ وہ گلہائے شگفتہ ہیں جو برباد نہیں
یک ہمہ حسنِ طلب، یک ہمہ جانِ نغمہ
تم جو بے داد نہیں ہم بھی تو فریاد نہیں
زندگی سیلِ تن آساں کی فراوانی ہے
زندگی نقش گرِ خاطرِ ناشاد نہیں
ان کی ہر اک نِگہ آموختۂ عکسِ نشاط
ہر قدم گرچہ مجھے سیلئ استاد نہیں
دیکھتے دیکھتے ہر چیز مِٹی جاتی ہے
جنتِ حسنِ نفس و جنتِ شداد نہیں
ہر جگہ حسنِ فزوں اپنی مہک دیتا ہے
باعثِ زینتِ گل تو قدِ شمشاد نہیں
خانہ سازانِ عناصر سے یہ کوئی کہہ دے
پر سکوں آبِ رواں، نوحہ کناں باد نہیں​

میرا جی