اگرچہ عہد ملاقات کو زمانہ ہوا

اگرچہ عہدِ ملاقات کو زمانہ ہوا

تمہارے ہجر میں کیا کچھ نہ بیتی کیا نہ ہوا

دلِ حزیں میں کسک رہ گئی محبت کی 

یہ اور بات کہ اظہارِ مدعا نہ ہوا

ترس گیا میں تِری ایک جنبشِ لب کو 

قرار دینے کوئی لفظ بھی ادا نہ ہوا

اٹھا سکا نہ کوئی زندگی کا بوجھ مگر 

سنبھالنے کو اسے صرف میرا شانہ ہوا

مذاق بن گئیں پیشین گوئیاں تیری 

جو ہونا تھا ہُوا، لیکن تِرا کہا نہ ہوا

ہر ایک خوفزدہ تھا مگر تعجب ہے 

ہلاکِ برق و شرر میرا آشیانہ ہوا

اسی کو حاصلِ عمرِ رواں سمجھتا ہوں 

مِری جبین ہوئی، تیرا آستانہ ہوا

بھنور سے بچ کے چلی آئی ناؤ ساحل پر 

عذابِ قہرِ تلاطم تو اک بہانہ ہوا

ہزار درد و الم تھے، مگر غنیمت ہے 

کہ میرا دل کبھی افسردۂ دعا نہ ہوا

نہ پوچھ خانہ بدوشوں کی بود و باش کبھی 

جہاں ٹھہر گئے، ان کا وہیں ٹھکانہ ہوا

رفیقِ راہ بناتا میں اور کس کس کو 

تِرے سوائے کوئی جبکہ دوسرا نہ ہوا

خدنگِ ناز ترا کب نہیں چبھا دل میں 

نگاہِ یار خطا کب تِرا نشانہ ہوا

ملیں وہ مجھ سے تو شاید نہ ان کو پہچانوں 

ہوا جو ان سے تعارف تو غائبانہ ہوا

وفا شعاری پہ کہتی ہے بے وفا مجھ کو 

یہ کس بلا سے خدا جانے دوستانہ ہوا

میں جس قدر ہُوا آمادۂ لطف پر ناظرؔ 

سلوک اور بھی کچھ اس کا جارحانہ ہوا

عبداللہ ناظر