موت ہمیں گلیوں گلیوں ڈھونڈتی رہے گی

On Death Bed

موت ہمیں

گلیوں گلیوں

ڈھونڈتی رہے گی

اور ہم اس سے آنکھ مچولی کھیلتے

بہار کے بچے کُھچے لمحے

گزارنے کی سعی میں

ایک دوسرے کو لمبی فون کالز پر

بوسوں کے تبادلوں کے منصوبے

ترتیب دیتے رہیں گے

وہ ہمیں ڈھونڈتی اِدھر آ نکلے

اور ٭ہائیڈ کی باری ہماری ہو

پھر بھی ہم اپنے محبوب کو

بسترِ مرگ پر

جنونی خطوط لکھنے سے باز نہ آئیں گے

ہم چاہیں گے

کوئی شدید پیاس کا مارا ہمیں

شیشے کے پار سے جھانکتا رہے

چاہتا رہے

کہ ہم موت کی بانہوں سے اس کی بانہوں میں

باحفاظت منتقل کر دئیے جائیں

ہم چاہیں گے

کوئی یار ہمارا

یہاں وہاں سے نظر چُرا کر

آنکھ مارتے ہوئے

ایک سُلگا سِگرٹ ہماری طرف اچھال دے

ایک سنہری لمحہ اپنے پاس سنبھال لے

ہم چاہیں گے

اونچی ایک آواز لگائیں

اور اپنے سپنوں کی لمبی لسٹ سنائیں

یہ سب سُن کر سارے لوگ خموش ہو جائیں

اور ہمیں ماضی کی طرح پھر خبطی سمجھا جائے

ہم چاہیں گے

ہم بدلے کی آگ جلائیں

اور پھر اس میں اپنے سچ اور جھوٹ سے کُندن ہار بنائیں

جس جس نے ہم کو روگ لگایا

اِس بستر سے بھاگیں، جا کر اُس کو مل کے آئیں

اور دِکھائیں دُکھتی رگ کا رُوپ سرُوپ

ہم چاہیں گے

کوئی ہمیں ملنے نہ آئے

اور ہم چھت کو کتنے ہی گھنٹے

یہ سب سوچے، تکتے جائیں

موت ہمیں آواز لگائے

اِس سے پہلے

ہم پھر ”اس” سے ملنے جائیں

اور اسے زندگی کے ساتھ مصروف پا کر

روتے روتے واپس آئیں

اک آخری بار بھرپور مسکرا کر

موت کی آغوش میں سو جائیں

فاطمہ مہرو

٭Hide