کہیں زمیں تو کہیں آسمان ہے عورت

 کہیں زمیں تو کہیں آسمان ہے عورت

حیا کے ساتھ ہے تو اک جہان ہے عورت

کہیں نشاں تو کہیں بے نشانیاں اس کی

ہے داستاں تو کہیں رازدان ہے عورت

کبھی کبھی تو سمیٹے ہوئے وہ سسکیوں کو

بہت خموش ہے لیکن بیان ہے عورت

بہن ہے بیوی ہے اور ہے یہاں پہ اک بیٹی

جو ماں کا روپ ہو تو سائبان ہے عورت

ہزار مشکلوں کو جھیل مسکراتی ہے

سمجھ سکو تو اسے داستان ہے عورت

سکھاتی ہے وہ تو آداب اپنے نسلوں کو

روایتوں میں سجی ایک شان ہے عورت

کہیں کہیں تو زمیں تنگ ہے بہت اس پر

کہیں کہیں تو بہت بد زبان ہے عورت

جو باپ بھائی اور شوہر کا اعتماد لیے

بچھائے اپنی محبت تو جان ہے عورت

پہن لیا ہے یہاں جس نے خواہشوں کا بدن

دھواں دھواں ہے وہ اور بدگمان ہے عورت

خدا کے سامنے سجدے کئے نہیں بکھری

اڑان اپنے لیے، اک چٹان ہے عورت

وہ جس کے پاؤں کے نیچے سجائی ہے جنت

ردا وہی تو بہت مہربان ہے عورت

ردا فاطمہ