عارفانہ کلام حمد نعت منقبت
احمدؐ کہوں کہ حامدِ یکتا کہوں تجھے
مولٰی کہوں کہ بندۂ مولٰی کہوں تجھے
کہہ کر پکاروں ساقئ کوثر بروزِ حشر
یا صاحبِ شفاعتِ کبریٰ کہوں تجھے
یا عالمین کے لیے رحمت کا نام دوں
یا پھر مکینِ گنبدِ خضریٰ کہوں تجھے
ویراں دلوں کی کھیتیاں آباد تجھ سے ہیں
دریا کہوں کہ ابر سخا کا کہوں تجھے
تجھ پر ہی بابِ ذاتِ صفاتِ خدا کُھلا
توحید کا مدرسِ اعلیٰ کہوں تجھے
پا کر اشارہ سورۂ یٰسیں کا اس طرف
دل چاہتا ہے سیدِ والاﷺ کہوں تجھے
زہراؑ ہے لختِ دل تو حَسنؑ ہے تِری شبیہہ
زینبؑ کا یا حسینؑ کا بابا کہوں تجھے
لفظوں نے ساتھ چھوڑ دیا کھو چکے حواس
میرے کریمﷺ! تُو ہی بتا کیا کہوں تجھے
اٹھتے ہی ہاتھ بھر گئیں منگتوں کی جھولیاں
حق تو یہ ہے کہ خَلق کا داتا کہوں تجھے
کرتا ہوں اختتامِ سخن اس پہ اب نصیر
کچھ سُوجھتا نہیں کہ کیا کیا کہوں تجھے
سید نصیرالدین نصیر
No comments:
Post a Comment