دل اور وہ بھی ٹوٹا ہوا دل

 دل اور وہ بھی ٹُوٹا ہُوا دل

اب زندگی ہے جینے کے قابل

کیا زندگی کا احساسِ کامل 

تیرے بغیر اے غارتِ گر دل 

ہوتا ہے جتنا خونِ تمنّا 

بڑھتی ہے اتنی رنگینئ دل 

جوشِ جنوں میں یکساں ہیں دونوں 

کیا گردِ صحرا کیا خاکِ منزل 

تقدیرِ انساں، اور یہ زمانہ

اک مرگ آساں اور وہ بھی مشکل 

لب پر تبسّم آنکھوں میں آنسو 

ہم لکھ رہے ہیں افسانۂ دل 

تسکین سے اکثر ہم بھی ملے ہیں 

کچھ بھی ہو لیکن ہے صاحبِ دل 

تسکین قریشی