عارفانہ کلام حمد نعت منقبت سلام
تجھ پہ درود بے کراں تجھ پہ سلام بے حساب
اے کہ تیرا وجود پاک کون و مکاں کا انتخاب
روح امینؑ قدم قدم تھامے ہوئے تیری رکاب
تیرے سوا ہوا ہے کون عرشِ بریں پہ باریاب
تجھ پہ درود بے کراں تجھ پہ سلام بے حساب
جلوۂ ماہِ نیم شب،۔ تابشِ نورِ آفتاب
تیرا وجود عنصری، عرشِ بریں پہ باریاب
کتنا عظیم تیرا کام، کتنا حسیں تِرا خطاب
تجھ پہ درود بے کراں تجھ پہ سلام بے حساب
تیری ہی ذات پاک ہے وجہِ فروغِ کائنات
فکر و نظر کے پیچ و خم رازِ سرشتۂ حیات
تِری نظر کے فیض سے روحِ بشر فروغ یاب
تجھ پہ درود بے کراں تجھ پہ سلام بے حساب
تیرے قدم فلک نواز، تیری نگاہ عرش گیر
تیری ضیائے نور سے شمس و قمر ہیں مستنیر
تیرا کمال بے مثال، تِرا جمال لا جواب
تجھ پہ درود بے کراں تجھ پہ سلام بے حساب
تیرے ظہور کے طفیل دونوں جہاں سنور گئے
باغ و چمن نکھر گئے، کون و مکاں سنور گئے
تیرا تبسمِ لطیف،۔ رونقِ صبحِ آفتاب
تجھ پہ درود بے کراں تجھ پہ سلام بے حساب
روحِ امیں نے دی صدا عرشِ بلند بام سے
میری جبینِ شوق بھی جھک گئی احترام سے
جلوہ گہِ جمال میں تیری دعا ہے مستجاب
تجھ پہ درود بے کراں تجھ پہ سلام بے حساب
تیری نوائے دل نشیں عشق و وفا کا شاہکار
تیرے سخا وجود سے غنچہ و گل پہ ہے بہار
تیری عطائے خاص سے برگ و ثمر ہیں مشکناب
تجھ پہ درود بے کراں تجھ پہ سلام بے حساب
عبدالکریم ثمر
No comments:
Post a Comment