نہیں جو تیری خوشی لب پہ کیوں ہنسی آئے

 نہیں جو تیری خوشی لب پہ کیوں ہنسی آئے

یہی بہت ہے کہ آنکھوں میں کچھ نمی آئے

اندھیری رات میں کاسہ بدست بیٹھا ہوں

نہیں یہ آس کہ آنکھوں میں روشنی آئے

ملے وہ ہم سے، مگر جیسے غیر ملتے ہیں

وہ آئے دل میں، مگر جیسے اجنبی آئے

خود اپنے حال پہ روتی رہی ہے یہ دنیا

ہمارے حال پہ دنیا کو کیوں ہنسی آئے

نہ جانے کتنے زمانوں سے ہم بہکتے ہیں

فقیہہ بہکے تو کچھ لطفِ مے کشی آئے

صلیب و دار کے قصے بہت پرانے ہیں

صلیب و دار تو ہمراہِ زندگی آئے

ہری نہ ہو نہ سہی، شاخِ نخل غم کی اریب

ہمارے گریۂ پیہم میں کیوں کمی آئے

سلیمان اریب