محبت روگ ہوتی ہے
سنو گڑیا
بہت نازک سی اک لڑکی
محبت روگ ہوتی ہے
ابھی تم نے درختوں سے
پرندوں کی کوئی ہجرت نہیں دیکھی
ابھی تم نے جوانی میں
کسی کی غمزدہ صورت نہیں دیکھی
سنو گڑیا! تمہاری آنکھ نے اب تک
شبِ فرقت نہیں دیکھی
سنو گڑیا
محبت روگ ہوتی ہے
سنو گڑیا
ابھی تم نے دسمبر میں
کسی کو سسکیاں بھرتے نہیں دیکھا
ابھی تم نے پتنگے کو
کسی شمع کے اوپر آنکھ سے مرتے نہیں دیکھا
سنو نازک کلی سی اک حسیں لڑکی
ابھی تم نے کسی کے رتجگے دیکھے نہیں شاید
ابھی تم نے کوئی محفل کی زینت دلنشیں بندہ
سُوئے جنگل کبھی جاتے نہیں دیکھا
سنو گڑیا
تمہارے ساتھ کچھ ایسا نہ ہو لیکن
اگر ایسا ہوا کچھ تو
بہت آنسو بہاؤ گی
یہی سب کو بتاؤ گی
محبت روگ ہوتی ہے
حافظ الماس
No comments:
Post a Comment