اپنے نہ جل سکے تو ہمارے بجھا دئیے

 اپنے نہ جل سکے تو ہمارے بُجھا دئیے

جتنے بھی تھے چراغ وہ سارے بجھا دئیے

اس بار دے ہی دیتا میں دُشمن کو مات بھی

لیکن یہ کس نے میرے سہارے بجھا دئیے

ان آنسوؤں کی بھیڑ سے ٹُوٹا ہے حوصلہ

بارش نے آج پھر سے ستارے بجھا دئیے

وحشت زدہ ہوا تھا تو آنکھوں کو چیر کر

آتے تھے جتنے خواب تمہارے، بجھا دئیے

یہ بات طے ہوئی تھی کہ جلتے رہیں دِیے

لیکن یہ کیا کہ دل سے اُتارے بجھا دئیے

احمد منیب