کب مجھے خطرۂ عذاب نہیں

 کب مجھے خطرۂ عذاب نہیں

دل مگر مائلِ ثواب نہیں

مجھ سے محرومیوں کی بات نہ کر

مجھ میں آہ و فغاں کی تاب نہیں

زندگی کا شمار کرتا ہوں

میرے غم کا کوئی حساب نہیں

تم ہی چہرے نہ پڑھ سکے ورنہ

کون تھا جو کُھلی کتاب نہیں

زندگی نام مُسکرانے کا

زندگی رنج و غم کا باب نہیں

عنقریب انقلاب آئے گا

یہ حقیقت ہے کوئی خواب نہیں

یہ سیاست بھی ایک دھوکا ہے

کس قدم پر نیا سراب نہیں

میں نے مانا کہ ہے بُرا کاوش

اس قدر بھی مگر خراب نہیں

محمود احمد کاوش