گندھ کے مٹی جو کبھی چاک پہ آ جاتی ہے

گُندھ کے مٹی جو کبھی چاک پہ آ جاتی ہے

بات بے مہریٔ افلاک پہ آ جاتی ہے

آسمانوں پہ اڑو، ذہن میں رکھو کہ جو چیز

خاک سے اٹھتی ہے، وہ خاک پہ آ جاتی ہے

رنگ و خوشبو کا کہیں کوئی کرے ذکر تو بات

گھوم پھر کر تِری پوشاک پہ آ جاتی ہے

بکھرا بکھرا سا ہے اندازِ تکلم ان کا

اور تہمت مِرے ادراک پہ آ جاتی ہے

نخل محفوظ رہیں، بادِ حوادث جو چلے

ایک آفت خس و خاشاک پہ آ جاتی ہے

چھوڑ جائے جو کوئی چاہنے والا فرتاش

زندگانی رہِ سفاک پہ آ جاتی ہے

فرتاش سید