فرصت نہ ملی کار جہاں بانی دل سے

 فرصت نہ ملی کارِ جہاں بانئ دل سے

اترے نہ کبھی تختِ سلیمانئ دل سے

کیا سرووسمن سیر کرے باغِ جہاں کے

حیراں ہے جو یک غنچہ گلستانئ دل سے

لوگو ابھی کچھ وقت ہے، چاہو تو بدل لو

دربانئ دنیا کو نگہبانئ دل💖 سے

ہے سنگِ تہِ آب، ہمالہ ہو کہ جودی

زخاری و موّاجی و طغیانئ دل سے

ہاتھ آئے جو قسمت سے وہ گنجینۂ خوبی

چھٹ جائیں ہم اس بے سروسامانئ دل سے

دنیا کی طرف دیکھ کے خوف آتا ہے مجھ کو

معمورئ آفاق ہے ویرانئ دل💔 سے

ظاہر میں تو سب جیب و گریباں ہے سلامت

ہے کام یہاں چاک بدامانئ دل💔 سے

پہناے دو عالم سے نکل جائیں گے ہم بھی

لگتا ہے یہ اندازِ پرافشانئ دل سے

ہر خار ہوا بادیۂ غیب کا سیراب

جاوید اسی آبلہ سامانئ دل سے

احمد جاوید