دونوں عالم سے عیاں تھا مجھے معلوم نہ تھا

 دونوں عالم سے عیاں تھا مجھے معلوم نہ تھا 

تُو ہی تُو جلوہ کناں تھا مجھے معلوم نہ تھا

قلب مضطر میں مِرے مہر و وفا کی صورت 

نور کا ایک جہاں تھا مجھے معلوم نہ تھا

جو بہا فرطِ ندامت سے حضوری میں تِری

کتنا وہ اشک گراں تھا مجھے معلوم نہ تھا

لالہ و گل میں فضاؤں میں مہ و انجم میں

تیرا ہی نور نہاں تھا مجھے معلوم نہ تھا

باغ ہستی میں جلا میرا وجودِ ہستی

صورتِ فصلِ خزاں تھا مجھے معلوم نہ تھا

جلی امروہوی