کبھی صحرا کبھی طوفانی منظر رقص کرتے ہیں
مِری آنکھوں کے قطروں میں سمندر رقص کرتے ہیں
جن آنکھوں میں کبھی ہم دیکھتے تھے اپنے چہرے کو
انہیں آنکھوں میں اب دیکھا ہے خنجر رقص کرتے ہیں
تمہارے بن کبھی کانٹے کبھی تلوار بنتے ہیں
تمہارے ساتھ ہوتے ہیں تو بستر رقص کرتے ہیں
تمہارے پاؤں کی ٹھوکر سے بستی ہو گئی صحرا
تمہارے پاؤں کے بوسوں سے پتھر رقص کرتے ہیں
درو دیوار کرتے ہیں تمہارے ہجر کا ماتم
تمہاری یاد کے چھت پر کبوتر رقص کرتے ہیں
محبت کے ستائے دل یہاں جو لوگ زندہ ہیں
ادب کے شہر میں بن کر سخنور رقص کرتے ہیں
دل سکندر پوری
No comments:
Post a Comment