یکساں روش گردش ایام نہیں ہے

 یکساں روشِ گردشِ ایام نہیں ہے

مُدت سے یہاں صبح وہاں شام نہیں ہے

دنیا مِری وحشت کا تمسخر نہ اڑائے

صحرا وہ گلستاں ہے جہاں دام نہیں ہے

آنسو بھی پیا کر پئے تسکیں جو پئے جائیں

ہر غم کا مداوا مئے گلفام نہیں ہے

کہہ دو تو بدل دیں روشِ گردشِ ایام

وحشت میں کوئی کام، بڑا کام نہیں ہے

کھوئی ہوئی نظروں میں بھی رہتی ہے قیامت

دل کے نہ دھڑکنے کا سکوں نام نہیں ہے

یہ حوصلہ و ولولۂ و جوشِ تمنا

کس کام کے، جب جرأتِ اقدام نہیں ہے

بہار کوٹی