افضل الانبیاء آپ ہی ہیں شہا خاتم الانبیاء

 عارفانہ کلام حمد نعت منقبت

افضل الانبیاء آپﷺ ہی ہیں شہاؐ خاتم الانبیاء

آپﷺ کے نام پر ہم ہیں دل سے فدا خاتم الانبیاء

بعد اللہ کے آپﷺ کا مرتبہ، آپﷺ صدرالعلیٰ

سب جہانوں میں کوئی نہیں آپﷺ سا خاتم الانبیاء

رب نے پیغام، اقراء کا بھیجا وہیں، لائے روح الامیںؑ

آپﷺ کے نور سے ہے منور حِرا، خاتم الانبیاء

سنگ برسائے طائف میں بدبختوں نے، خوں سے جوتے بھرے

آپﷺ نے پھر بھی ان کا نہ چاہا بُرا، خاتم الانبیاء

آپﷺ ہی کو سراجاً منیرا، کہا رب نے قرآن میں

آپﷺ شمس الضحیٰ، آپﷺ بدرالدجیٰ خاتم الانبیاء

مہرباں مہرباں، راحت قلب و جاں، مونس بے کساں

آپﷺ رحمت لقب اور عطا ہی عطا، خاتم الانبیاء

پھول روضے پہ کہتا ہے رو رو کے اب ہو کرم کی نظر

دین و دنیا میں ہے آپﷺ کا آسرا، خاتم الانبیاء

تنویر پھول