مدت ہوئی ہے یار کو مہماں کئے ہوئے

مدت ہوئی ہے، یار کو مہماں کئے ہوئے
جوشِ قدح سے بزمِ چراغاں کئے ہوئے
کرتا ہوں جمع پهر جگرِ لخت لخت کو
عرصہ ہُوا ہے دعوتِ مژگاں کئے ہوئے
پهر وضعِ احتیاط سے رُکنے لگا ہے دَم
برسوں ہوئے ہیں چاکِ گریباں کئے ہوئے
پهر گرمِ نالہ ہائے شرربار ہے نفس
مُدّت ہوئی ہے سیرِ چراغاں کئے ہوئے
پھر پُرسشِ جراحتِ دل کو چلا ہے عشق
سامانِ صد ہزار نمک داں کئے ہوئے
پهر بهر رہا ہے خامۂ مژگاں، بہ خونِ دل
سازِ چمن طرازئ دَاماں کئے ہوئے
باہم دِکر ہوئے ہیں دل و دیده پهر رقیب
نظّاره و خیال کا ساماں کئے ہوئے
دِل پهر طوافِ کوئے ملامت کو جائے ہے
پندار کا صنم کده ویراں کئے ہوئے
پهر شوق کر رہا ہے خریدار کی طلب
عرضِ متاعِ عقل و دل و جاں کئے ہوئے
دوڑے ہے پهر ہر ایک گُل و لالہ پر خیال
صد گلستاں نِگاه کا ساماں کئے ہوئے
پهر چاہتا ہوں نامۂ دِلدار کهولنا
جاں نذرِ دل فریبئ عنواں کئے ہوئے
مانگے ہے پهر، کسی کو لبِ بام پر ہوس
زلفِ سیاہ رُخ پہ پریشاں کئے ہوئے
چاہے ہے پهر، کسی کو مقابل میں، آرزو
سرمہ سے تیز دشنۂ مژگاں کئے ہوئے
اِک نو بہارِ ناز کو تاکے ہے پهر نِگاہ
چہرہ فروغِ مے سے گُلستاں کئے ہوئے
پهر، جی میں ہے کہ در پہ کسی کے پڑے رہیں
سر زیر بارِ منّتِ درباں کئے ہوئے
جی ڈهونڈتا ہے پهر وہی فرصت کے رات دن
بیٹهے ہیں تصّورِ جاناں کئے ہوئے
غالبؔ ہمیں نا چهیڑ کہ پهر جوشِ اشک سے
بیٹهے ہیں ہم تہیّۂ طوفاں کئے ہوئے

مرزا غالب