سر گرا تیغ گری خاک پہ دستار گری

 سر گِرا، تیغ گِری، خاک پہ دستار گِری

کل سرِ رزم مِرے خون کی جب دھار گری

یہ کہاں آ کے تِرے ہاتھ ہوئے شل افسوس

یہ کہاں آ کے تِری ڈھال بھی سالار گری

اس سے پہلے تو محبت نہ تھی اتنی ارزاں

آ کے اس جنس کی قیمت سرِ بازار گری

جیت کر بھی نہ اُتاری تھی کبھی میں نے زرہ

ہار کر بھی نہ مِرے ہاتھ سے تلوار گری

بسترِ ہجر پہ کچھ ایسے تھکا جسم گرا

جیسے پانی پہ کوئی ریت کی دیوار گری

نکہتوں میں وہ بدن رنگ فشانی لایا

گُل و گُلزار پہ اس حسن کی مہکار گری

ملی اجداد سے حیدر جو رعونت سر کو

سرِ دربار گری وہ نہ سرِ دار گری

فقیہہ حیدر