کتنا آساں ہے یہ کہنا یہ تیری ناکامی صلہ ہے

 بے رتبہ آنکھیں

کتنا آساں ہے یہ کہنا

یہ تیری ناکامی صلہ ہے تیرے کرموں کا

اسمِ اعظم سے پہچانے جانے والے

میری نیکی کی سچائی

میری جبیں اور مِرے سجدے

تیرے جہانوں کی گردش میں

ٹھوکریں کھا کر ہانپ رہے ہیں

کون پھلانگ سکا ہے اس کو

میرے خیالوں کی وحشت نے 

جو دیوار اٹھا رکھی ہے

جس کے اُدھر ہے میرے ارادوں

کی اک عاجز دنیا

جس کے اندھے غار کے اندر

زخمی تدبیروں کے سائے رینگ رہے ہیں

جس کے آگے ہے اک اور ہی دنیا

شمسی نظاموں کے جلوؤں سے

روشن دنیا، تیری دنیا

جس کے تلے بے رتبہ آنکھیں

میری آنکھیں، نادم، بے بس

تیرے کرم کی آس لگائے، کُچلی پڑی ہیں

فیصل ہاشمی