عدو تو چھوڑ دئیے خیر خواہ مار دئیے
محافظوں نے کئی بے گناہ مار دئیے
بہت ستائے ہوئے لشکروں کی ہیبت نے
درونِ قصر کئی بادشاہ مار دئیے
لہو تڑپنے لگا ہے کہ سرخ نوٹوں نے
بھری کچہری میں سارے گواہ مار دئیے
اندھیرا جب بھی بڑھایا گیا زمانے میں
چراغِ حق نے سبھی رُو سیاہ مار دئیے
جب آئی بات کبھی ہمسری سے مسند پر
تو سربراہوں نے کچھ سربراہ مار دئیے
نہیں ہے وقت سا عادل کوئی یہاں جس نے
کُلاہیں رول دیں اور کج کُلاہ مار دئیے
جاوید عادل سوہاوی
No comments:
Post a Comment