مجھے بے خودی یہ تو نے بھلی چاشنی چکھائی

مجھے بیخودی یہ تُو نے بھلی چاشنی چکھائی

کسی آرزو کی دل میں نہیں اب رہی سمائی

نہ حذر ہے نے خطر ہے نہ رِجا ہے نہ دعا ہے

نہ خیالِ بندگی ہے نہ تمنائے خدائی

نہ مقامِ گفتگو ہے نہ محلِ جستجو ہے

نہ وہاں حواس پہنچیں نہ خِرد کو ہے رسائی

نہ مکیں ہے نے مکاں ہے نہ زمیں ہے نے زماں ہے

دل بے نوا نے میرے جہاں چھاؤنی ہے چھائی

نہ وصال ہے نہ ہجراں نہ سرور ہے نہ غم ہے

جسے کہیۓ خوابِ غفلت سو وہ نیند ہم کو آئی

من و تو اٹھے جہاں ہوں ہوسیں وہاں کہاں ہوں

جو دوئی کے تھے لوازم سو رہائی ان سے پائی

یہاں میں رہا ہوں جب تو سخنِ نیازؔ بولوں

سنو گے زبانِ نے سے وہی جو کہے گا نائی

شاہ نیاز بریلوی