غنچہ جو سرِ شاخ چٹکتے ہوئے دیکھا
پہلو میں بہت دل کو دھڑکتے ہوئے دیکھا
مہندی رچے ہاتھوں نے اٹھایا ہی تھا گھونگھٹ
اک شعلۂ جوالہ لپکتے ہوئے دیکھا
بھولا نہیں احساس تِرے لمس کی خوشبو
تنہائی میں انفاس مہکتے ہوئے دیکھا
وہ تیرے بچھڑنے کا سماں یاد جب آیا
بیتے ہوئے لمحوں کو سسکتے ہوئے دیکھا
کھینچے ہوئے اب تیر کماں میں ہے وہ بالک
آغوش میں جس کو نہ ہمکتے ہوئے دیکھا
جب جب بھی چراغوں کی لویں ہم نے بڑھائیں
کیا کیا نہ ہواؤں کو سنکتے ہوئے دیکھا
عشرت قادری
No comments:
Post a Comment