تجھے پکار رہی ہوں یہی مری حد ہے

 تجھے پکار رہی ہوں یہی مِری حد ہے

اب اس سے بڑھ کے بھلا اور بھی کوئی حد ہے

مجھے ملی ہے مِرے گھر سے کافی آزادی

مگر یہ شرم و حیا میری اپنی ہی حد ہے

تمہاری شرطوں پہ جیتے رہے ہیں ساری عمر

تمہاری نظروں میں کیا یہ بھی سرسری حد ہے

تو یعنی ہاتھ اٹھائے گا اب کے تُو مجھ پر؟

تو یعنی گرنے کی تیری یہ آخری حد ہے

کسی کے پیار میں اقدار بھول سکتی نہیں

میں جانتی ہوں یہ دہلیز ہی مِری حد ہے

بلقیس خان