جو آنسوؤں کی زباں کو میاں سمجھنے لگے
سمندروں کا وہ دردِ نہاں سمجھنے لگے
یہ جب سے جانا کہ زہرِ بدن نکلتا ہے
ہم آنسوؤں کو بھی جنسِ گراں سمجھنے لگے
جو ٹپکے دامنِ ہستی پہ اشکِ خوں میرے
تو اہل زر اسے گلکاریاں سمجھنے لگے
سروں پہ اوڑھ کے مزدور دھوپ کی چادر
خود اپنے سر پہ اسے سائباں سمجھنے لگے
شجر کو اپنی زمیں سے لپٹ کے رہنا ہے
یہ بات اڑتے پرندے کہاں سمجھنے لگے
میں چُپ ہوا تھا کہ ٹکراؤ ختم ہو جائے
وہ میرے صبر کو کمزوریاں سمجھنے لگے
وہ جب سے آ گئے مہمان بن کے آنکھوں میں
ہم اپنے دل کے کھنڈر کو مکاں سمجھنے لگے
شارب مورانوی
No comments:
Post a Comment