عارفانہ کلام منقبت سلام مرثیہ
دیارِ قُدسِ وفا میں حسینؑ کی خوشبو
رضائے حکم خدا میں حسین کی خوشبو
قبولیت کے گلوں کو سمیٹ لاتی ہے
ہتھیلیوں کی دعا میں حسین کی خوشبو
کبھی وہ گود میں کھیلیں وہ دوش پر بیٹھیں
نبیﷺ کی بوئے قبا میں حسین کی خوشبو
قبولیت کا ہر اک باب کھول دیتی ہے
لبوں کی پاک دعا میں حسین کی خوشبو
صداقتوں کا دلاتی ہوئی ہمیں احساس
بوقتِ ظہر ندا میں حسین کی خوشبو
پڑھا ہے ہم نے کتابوں میں سالکوں کے بقول
کہ ہے فنا و بقا میں حسین کی خوشبو
رچی بسی ہوئی محسوس ہو رہی ہے ہمیں
ردائے ارض و سما میں حسین کی خوشبو
صداقتوں پہ شہادت کا درس دیتی ہوئی
فضائے شہرِ وفا میں حسین کی خوشبو
دلاسے دیتی ہے زینب کے آنسو پونچھتی ہے
بکھر کے دشتِ بلا میں حسین کی خوشبو
مہک مہک اٹھے اشعار سب تِرے مسرور
بسی ہے تیری نوا میں حسین کی خوشبو
انس مسرور
No comments:
Post a Comment