رستے رُوٹھ جاتے ہیں
اگر پامال راہوں پر قدم رکھنے کی عادت ختم ہو جائے
مشامِ جاں میں خُوشبو کی بجائے درد در آئے
وصال آمادہ شہراہوں پہ فرقت کا بسیرا ہو
اک ایسا وقت آ جائے
جو تیرا ہو نہ میرا ہو
محبت کی سنہری جھیل پر غم کی گھنیری رات چھائی ہو
کناروں پر فقط نمدیدہ تنہائی کی کائی ہو
چمکتے پانیوں پر تھرتھراتے عکس کھو جائیں
روپہلی دھوپ میں سرسبز پگڈنڈی اچانک زرد پڑ جائے
سمندر کی نمیدہ ریت پر نقشِ قدم لہریں نگل جائیں
وہ آنکھیں جن میں ست رنگے سجیلے خواب رہتے ہوں
وہاں آسیب بس جائے
جو دونوں سمت سے سایہ فگن پیڑوں تلے بھی
چلچلاتی دھوپ پھیلی ہو، جہاں ہر روز جانا ہو
وہاں پر گھاس اُگ آئے
تو رستے روٹھ جاتے ہیں
سلمان باسط
No comments:
Post a Comment