تم تو وفا شناس و محبت نواز ہو

ان کی شکایتوں کا لکھا میں نے یہ جواب

تم تو وفا شناس و محبت نواز ہو
ہاں میں دغا شِعار سہی، بے وفا سہی
تم کو تو ناز ہے دلِ اُلفت نصیب پر
میں ماجرائے درد سے ناآشنا سہی
ناآشنائے درد کو شکوہ سے کیا غرض
تم کو شکایتِ غمِ فرقت روا سہی
تم کو تو رسمِ ظُلم و سِتم سے ہے اِجتناب
تم سر بسر عطا سہی اور میں خطا سہی
میں محفلِ نشاط میں نغمہ طرازِ شوق
تم زیرِ لب تبسّم حسرت نُما سہی
تم کو خیالِ غم سبب اضطرابِ دل
مجھ کو بیانِ درد مسرّت فضا سہی
تم کو میرا تساہلِ خط وجہِ انتشار
مجھ کو تمہارا طرزِ تغافل ادا سہی
میں انتظارِ خط کی صعوبت سے بے خبر
تم انتظارِ خط میں سدا مُبتلا سہی
میں اشتیاقِ دید و مروّت سے بے نیاز
اور تم نگار خانۂ مہر و وفا سہی
ہے اِک وفا شناس کو پاسِ وفا اے اداؔ
ورنہ کہاں ہم اور کہاں بخششِ خطا

ادا جعفری