گناہ عمر گزشتہ سے توبہ کافی ہے

گناہِ عمرِ گزشتہ سے توبہ کافی ہے

تِرے کرم کے لیے ایک لمحہ کافی ہے

جہاں نوردی برائے سکون زحمت ہے

سکونِ دل کے لیے ایک گوشہ کافی ہے

عجیب اپنے ہیں اپنوں سے بغض رکھتے ہیں

ہمارے مرنے کو اتنا ہی صدمہ کافی ہے

خدا کی سمت اشارہ بھی ہو نہیں سکتا

سمجھنے والے کو اتنا اشارہ کافی ہے

منافقت کے بیاں میں مثالیے کے لیے

کسی بھی دور میں دیکھیں تو کوفہ کافی ہے

کسی حرام کمائی کی پوری روٹی سے

ہمیں حلال کا چھوٹا سا لقمہ کافی ہے

نہیں نہیں یہ گریبان چاک مت کرنا

گزرتے وقت پہ لفظوں کا نوحہ کافی ہے

ہم اہلِ دل کے بہکنے کے واسطے تحسین

کسی کی مست نگاہی کا فتنہ کافی ہے

یونس تحسین