مِٹتی لکیر رہ گئی ہے آسمان پر
پنچھی چلے گئے ہیں اچانک اُڑان پر
کشتی ڈبو کے دھاڑتا طوفان تھم گیا
اس کے نشان رہ گئے بس بادبان پر
اب بھی جواز ڈھونڈتا ہے بےوفائی کے
غصہ بھی آ رہا ہے دلِ خوش گمان پر
اتنا تھا سحر جھانکتا آنکھوں کی اوٹ سے
ہم نے یقین چھوڑ دیا اک گمان پر
غاروں میں رہنے والے تو روپوش ہو گئے
کندہ نقوش رہ گئے اُبھری چٹان پر
آہو پہاڑ چھوڑ کے صحرا میں جا بسے
بیٹھے شکاری رہ گئے اونچی مچان پر
گروی نہیں رکھا کبھی پندار بھی حنیف
سودا نہیں کِیا ہے کبھی اپنی آن پر
حنیف دیپ
No comments:
Post a Comment