عارفانہ کلام نعتیہ کلام
ایک بے نام کو اعزازِ نسب مل جائے
کاش مداحِ پیمبرﷺ کا لقب مل جائے
میری پہچان کسی اور حوالے سے نہ ہو
اقتدارِ درِ سلطانِ عربﷺ مل جائے
آدمی کو وہاں کیا کچھ نہیں ملتا ہو گا
سنگریزوں کو جہاں جنبشِ لب مل جائے
کس زباں سے میں تِری ایک جھلک بھی مانگوں
طلبِ حُسن تو ہے،. حُسنِ طلب مل جائے
اب تو گھر میں بھی مسافر کی طرح رہتا ہوں
کیا خبر اذنِ حضوریؐ مجھے کب مل جائے
خیمۂ دل تِرے جلووں سے منور کر لوں
دیدۂ شوق کو بیدارئ شب مل جائے
تُوﷺ اگر چھاپ غلامی کی لگا دے مجھ پر
مجھ گنہ گار کو پروانۂ رب مل جائے
دے نہ قسطوں میں مظفر کو محبت اپنی
جس قدر اس کے مقدر میں ہے سب مل جائے
مظفر وارثی
No comments:
Post a Comment