حال پوشیدہ کھلا سامان عبرت دیکھ کر

 حال پوشیدہ کھلا سامان عبرت دیکھ کر

پڑھ لیا قسمت کا لکھا لوح تربت دیکھ کر

اس قدر بے خود ہوا آثار وحشت دیکھ کر

آئینہ سے نام پوچھا اپنی صورت دیکھ کر

جام کوثر دست ساقی میں نظر آیا مجھے

اٹھ گیا آنکھوں کا پردہ ابر رحمت دیکھ کر

تیرے کوچے میں تِرا جلوہ نظر آیا مجھے

صانع جنت کو دیکھا باغ جنت دیکھ کر

منہ ہمارا جلوۂ دیدار کے لائق کہاں

اپنی صورت دیکھتے ہیں تیری صورت دیکھ کر

چار دیوار عناصر پر سفیدی پھر گئی

آنکھیں روشن ہو گئیں تیری صباحت دیکھ کر

وحشت دل حشر کے دن بھی رہے کاؤس طلب

کانٹے ڈھونڈھے ہم نے صحرائے ‌ قیامت دیکھ کر

چہچہے بلبل کے آواز کف افسوس ہوں

رنگ گل اڑ جائے میرا داغ حسرت دیکھ کر

ابر ادھر آیا ادھر مے خواروں کا بیڑا ہے پار

کشتیِ مے مول کے دریائے رحمت دیکھ کر

آنسو پونچھے یاد آیا جب جوانی کا مزا

آنکھیں ملتے رہ گئے ہم خواب راحت دیکھ کر

برہمن کعبہ میں آیا شیخ پہونچا دیر میں

لوگ بے وحدت ہوئے ہیں تیری کثرت دیکھ کر

ہر گھڑی آتی ہے کانوں میں یہ آواز جرس

کون دنیا سے سفر کرتا ہے ساعت دیکھ کر

نشہ کے اسباب تزئیں میں بھی نشہ ہے ضرور

میری آنکھیں چڑھ گئیں میخانہ کی چھت دیکھ کر

اب نہیں نازک مزاجی سے توجہ کا دماغ

اے اجل آنا کبھی ہنگام فرصت دیکھ کر

وہ موحد ہوں نہ رکھا دوسرے سے اتحاد

روح نے چھوڑا بدن کو ضد وحدت دیکھ کر

خون بلبل سے مگر سینچا ہے باغ دہر کو

ہم لہو برساتے ہیں پھولوں کی رنگت دیکھ کر

تیرے بندے سر جھکاتے ہیں بتوں کے سامنے

سجدے کرتا ہوں الٰہی تیری قدرت دیکھ کر

جی لگا کر یہ غزل کس طرح کہئے اے منیر

بجھ گیا دل کوچ منزل کی عزیمت دیکھ کر

منیر شکوہ آبادی