دل اسے دیکھ کے ایسے مِرے اندر ناچا
جیسے اک پیڑ ہواؤں سے لِپٹ کر ناچا
ایک خُوشبو کی لہر سے مِرا آنگن مہکا
ایک دستک ہوئی ایسی کہ مِرا گھر ناچا
ایک سایہ تھا مِرے جسم سے لگ کر بیٹھا
ایک سایہ مِرے اندر سے نکل کر ناچا
ایک دن جب مِری قسمت کا ستارہ چمکا
بند مُٹھی میں مقدّر کو چُھپا کر ناچا
ایک جنگل سے یہ چُپ چاپ ندی پُوچھتی ہے
کون ڈُوبا ہے جو اُٹھ اُٹھ کے سمندر ناچا
کمیل کاظمی
No comments:
Post a Comment