اگر شوقِ جنوں ہو آزمانا
دِیوں کو تیز آندھی میں جلانا
ہماری ایک عادت بن گئی ہے
غم و یاس و الم میں مُسکرانا
کُچل کر گردشِ شام و سحر کو
بہت تیزی سے چلنا ہے زمانہ
یہاں اپنوں کو ترسے ہیں نگاہیں
کہاں لے آیا ہم کو آب و دانہ
ہمارا گھر نہیں ہے اک قفس ہے
ہمیں باہر کہیں آنا نہ جانا
نہیں آتی نظر اپنوں کی صورت
کسی سے اب نہیں مِلنا ملانا
ہوئے ہیں خواب اب ماضی کے لمحے
وہ مِل کر بیٹھنا، پِینا، پِلانا
اب آہوں سے شرارے جھڑ رہے ہیں
ہُوا معدوم اب گانا، بجانا
یہی اک مشغلہ اب رہ گیا ہے
کسی کی یاد کرنا، گُنگنانا
ہیں دل میں سیکڑوں شِکوے جفا کے
لبوں پر ہے محبت کا ترانہ
خموشی سے نکال اب کام گوہر
کسے فُرصت سُنے تیرا فسانہ
کلدیپ گوہر
No comments:
Post a Comment