آج اشک میرے نعت سنائیں تو عجب کیا

عارفانہ کلام نعتیہ کلام

آج اشک میرے نعتؐ سنائیں تو عجب کیا

سن کر وہؐ مجھے پاس بلائیں تو عجب کیا

اُنﷺ پر تو گنہ گار کا سب حال کُھلا ہے

اس پر بھی وہ دامن میں چھپائیں تو عجب کیا

منہ ڈھانپ کے رکھنا کہ گنہ گار بہت ہوں

میت کو میری دیکھنے آئیں تو عجب کیا

اے جوشِ جنوں پاسِ ادب، بزم ہے جن کی

اس بزم میں تشریف وہ لائیں تو عجب کیا

دیدار کے قابل تو نہیں چشمِ تمنا

لیکن وہ کبھی خواب میں آئیں تو عجب کیا

پابندِ نوا تو نہیں فریاد کی رسمیں

آنسو یہ مِرا حال سنائیں تو عجب کیا

نہ زادِ سفر ہے نہ کوئی کام بھلے ہیں

پھر بھی مجھے سرکارﷺ بلائیں تو عجب کیا

حاصل جنہیں آقاﷺ کی غلامی کا شرف ہے

ٹھوکر سے وہ مردوں کو جِلائیں تو عجب کیا

وہ حسنِ دو عالم ہیں ادیب ان کے قدم سے

صحرا میں اگر پھول کھل آئیں تو عجب کیا

ادیب رائے پوری