نئی نعت لکھوں نیا سال ہے

عارفانہ کلام نعتیہ کلام

نئی نعت لکھوں نیا سال ہے​

کہ نوروز سے جی بھی خوشحال ہے​

خدا ہے محمدﷺ ہے اور آل ہے​

سوا ان کے جو کچھ ہے جنجال ہے​

سمندِ قلم کی دمِ وصفِ شاہ​

نئی ہے روش اور نئی چال ہے

​ہے نعتِ نبیﷺ ذکرِ پروردگار​

کہ یہ تو عمل حُسنِ اعمال ہے​

نمازوں میں شہؐ کا تصور رہے ​

کہ یہ حال ہے اور وہ قال ہے​

رسائی ہے جس کی درِ شاہ پر​

وہی صاحبِ جاہ و اقبال ہے​

پیمبرؐ کی انگلی کا ہے وہ نشاں​

رُخِ مہ پہ سمجھا جسے خال ہے​

ڈروں تیغِ آفت کے کیوں وار سے​

کہ نامِ محمدﷺ مری ڈھال ہے​

غمِ دین و دنیا مجھے کچھ نہیں​

ثنا خوانِ شہﷺ فارغ البال ہے​

نہیں کچھ مِرے دل میں جُز شوقِ نعت​

کہ ہر حسرت و حرص پامال ہے​

میں عُسرت میں لکھتا ہوں نعتِ نبی​ؐ

خدائے جہاں کا یہ افضال ہے​

ورق چند ہیں نعت کے میرے پاس​

یہی اپنی پونجی، یہی مال ہے​

ہے پائے محمدﷺ سرِ دِلّو رام​

یہ نسبت مِرے اوج پر دال ہے​

مدینے کے آنے لگے خواب روز​

میاں کوثری! نیک یہ فال ہے​

کوثر علی کوثری (دلو رام کوثری)