ہیں محو حیرت دنیا دماغ کتنے ہی

 ہیں محوِ حیرتِ دنیا دماغ کتنے ہی

مِلا نہ تُو مِلے تیرے سراغ کتنے ہی

یہ سال کیسی ہواؤں کو ساتھ لایا ہے

بُجھا دئیے ہیں پرانے چراغ کتنے ہی

یہ کیا کہ روز نیا زخم مِل رہا ہے ہمیں

ابھی تو مٹنے نہ پائے تھے داغ کتنے ہی

یہ ان کے لہجے کی تاثیر تھی کہ باتوں کی

دکھا دئیے ہیں ہمیں سبز باغ کتنے ہی

ہے اب بھی دل مِرا آمادۂ محبت کیوں

مِلے ہیں گرچہ محبت میں داغ کتنے ہی

یہی وہ غم تھا جو اقبال کو ستاتا رہا

مِلا نہیں انہیں شاہیں تھے زاغ کتنے ہی

بِنا پلائے ہی رُخصت کیا ہمیں سعدی

وہ بھر رہا تھا اگرچہ ایاغ کتنے ہی

سعید سعدی