یا علی مرتضیٰ اے رازدان مصطفیٰ

 عارفانہ کلام حمد نعت منقبت سلام

یا علیِؑ مرتضیٰؑ اے رازدانِ مصطفیٰﷺ​

مصطفیٰؐ کے بعد تیرا ہے مکانِ مصطفیٰ​ؐ

جس کا مولیٰ مصطفیِٰ ہے اُس کا مولیٰ تُوؑ بھی ہے​

دوست رکھتے ہیں تجھے سب دوستانِ مصطفیٰؐ​

شوہرِ زہراؑ ہے تُوؑ، صلِ علیٰؐ صلِ علیٰﷺ​

تجھ سے قائم ہے جہاں میں خاندانِ مصطفیٰ​ؐ

ہے حسنؑ خُورشید تیرا، ہے قمر تیرا حسین​ؐ

یہ ہے روحِ مصطفیٰؐ اور وہ ہے جانِ مصطفیٰ​ؐ

لحمک لحمی تجھے اکثر محمدﷺ نے کہا​

نفسِ پیغمبرﷺ ہے تُوؑ حسبِ بیانِ مصطفیٰ​ؐ

ہے تِراؑ دیدار، دیدارِ حبیبِ ذوالجلالﷺ​

تیری کرتے ہیں زیارت عاشقانِ مصطفیٰ​ؐ

تُوؑ ہے بابِ مصطفیٰؐ اور مصطفیٰؐ ہے شہرِ علم​

بے تِرےؑ کیونکر ملے پھر آستانِ مصطفیٰ​ؐ

کعبۂ ربِّ جہاں تیری ولادت گاہ ہے​

پاک اور طاہر ہے تُوؑ مثلِ دہانِ مصطفیٰ​ؐ

نُور تیراؑ نُورِ احمدﷺ، نورِ احمد نورِ حق​

شان تیری شانِ حق ہے، یا ہے شانِ مصطفیٰ​ؐ

بھر گیا علمِ لدُنّی سینۂ پُر نُور میں​

جب کہ تُوؑ نے مہد میں چوسی زبانِ مصطفیٰ​ؐ

تجھ سے آئینِ ادب سیکھے ہیں اُس نے قبلِ خلق​

کیوں نہ پھر رُوح القدسؑ ہو پاسبانِ مصطفیٰ​ؐ

جس طرح خورشیدِ تاباں سے منور ہے فلک​

اس طرح روشن ہے تجھؑ سے آسمانِ مصطفیٰ​ؐ

حامئ ملّت ہے تُوؑ اے خُسروِ خیبر شکن​

ہو گئے معدوم تجھ سے دُشمنانِ مصطفیٰ​ؐ

بسترِ خیر الوریٰ پر سویا تو ہجرت کی شب​

خوف میں تو بن گیا دارالامانِ مصطفیٰ​ؐ

تیری تیغِ کفر کش اسلام کی پہلی بنا​

تیرا علمِ پاک ہے فیضِ لسانِ مصطفیٰ​ؐ

اے وصیِ مصطفیٰؐ تو سابق الاسلام ہے​

ذاتِ اقدس ہے تِری جانِ جہانِ مصطفیٰ​ؐ

تیری شمشیرِ دو دم کی آبِ نصرت کیا کہوں​

جس سے ہے سرسبز اب تک بُوستانِ مصطفیٰ​ؐ

خندق و بدر و احد میں تُو تنِ تنہا لڑا​

تیرا دم گویا تھا اک فوجِ کرانِ مصطفیٰ​ؐ

چوم لیتی تھی پھریرا نصرتِ پروردگار​

جب اٹھاتا تھا وغا میں تُو نشانِ مصطفیٰ​ؐ

کوثری کے کام دو ہیں، ایک ہی لیکن مآل​

ہے ثنا خواں تیرا یہ، اور مدح خوانِ مصطفیٰ​ؐ

​

کوثر علی کوثری (دلو رام کوثری)