کوشش مسلسل بھی رائیگاں سی لگتی ہے

کوششِ مسلسل بھی رائیگاں سی لگتی ہے

آرزوئے دل اب تو نیم جاں سی لگتی ہے

کچھ مشیتِ یزداں سرگراں سی لگتی ہے

یا مِری طبیعت ہی بد گماں سی لگتی ہے

نغمہ جُو نہ ہو اے دل! وقت اب نہیں ایسا

ہر گھڑی مجھے دنیا نوحہ خواں سی لگتی ہے

جب بھی آئے یہ ظالم ساتھ لے کے ہے جائے

موت زندگی کی کچھ رازداں سی لگتی ہے

فنِ سحر کہئے یا سحرِ فن ستم گر کا

جور و قہر کی صورت مہرباں سی لگتی ہے

عضو عضو ناکارہ عالمِ ضعیفی میں

جز نظرؔ کہ ہے بالغ نوجواں سی لگتی ہے

نظر لکھنوی​

(محمد عبدالحمید صدیقی)