سانولے جسم کی ہر قوس میں لہراتا ہے

 سانولی

سانولے جسم کی ہر قوس میں لہراتا ہے

مسکراتی ہوئی شاموں کا سلونا جادو

رقص کرتی ہے تیرے حُسن کی رعنائی میں

وادئ نجد کے جھونکوں کی لجیلی خوشبو

یہ تیرے دوش پہ بل کھا کے بکھرتی زُلفیں

جیسے معبد میں سلگتے ہوئے صندل کا دُھواں

جیسے مغموم مصور کے سیہ پوش خیال

جیسے موھوم جزیروں کی چھبیلی پریاں

تو وہ برسات کی گھنگھور گھٹا ہے جس میں

ایک کیفیت نغمات چھپی بیٹھی ہو

تُو کسی دل کا وہ سنولایا ہوا گوشہ ہے

جس میں رنگینئ جذبات چھپی بیٹھی ہو

دُودھیا حُسن سے اُکتا کے میری نظروں نے

جب بھی دیکھا ہے تیرے رنگ کا بھرپور نکھار

گونج اُٹھی ذھن میں اُڑتے ہوئے بھنوروں کی صدا

رچ گئی رُوح میں گاتی ہوئی کوئل کی پکار

کون ہے جس نے تیرا ذکر نہ چھیڑا ہو

اب تو ہر بزم کا ہے ایک موضوعِ سخن

کوئی دیتا ہے لقب لیلۂ بے محمل کا

کوئی کہتا ہے تجھے پیار سے کالی ناگن

کون سا لفظ تیرے واسطے ایجاد کروں

سوچتا ہوں تجھے کس نام سے میں یاد کروں

قتیل شفائی