مرے اندر بھی جوہر کم نہیں ہے

 مِرے اندر بھی جوہر کم نہیں ہے

مِری خو میں تو لیکن ہم نہیں ہے

پرائی روشنی لے کر کروں کیا

چراغ اپنا ابھی مدھم نہیں ہے

گرے ہیں جو مِری آنکھوں سے موتی

وہ آنسو ہے کوئی شبنم نہیں ہے

سنا ہے تیرے بازو ہیں توانا

ہمارا حوصلہ بھی کم نہیں ہے

چلو اچھا ہوا یہ جان کر بھی

مِری چاہت سے وہ برہم نہیں ہے

قیامت تک رہے گی قوم زندہ

مٹا دے کوئی اس میں دم نہیں ہے

میں تنہا ہی گزارا کر رہا کررہا ہوں

یہاں میرا کوئی ہمدم نہیں ہے

چھڑکتا ہے مِرے زخموں پہ اکثر

نمک ہے وہ میاں مرہم نہیں ہے

زباں خاموشیوں کی جانتا ہوں

کہانی اتنی بھی مبہم نہیں ہے

پلٹ سکتا ہوں اک سجدے سے قسمت

نہ کہنا مجھ میں اتنا دم نہیں ہے

سمجھتا ہے زمانے کی روش وہ

نظر قیصر کی بھی کچھ کم نہیں ہے

امتیاز قیصر