بادشاہا تیرے اعصاب پہ طاری میں تھی

بادشاہا! تیرے اعصاب پہ طاری میں تھی

وہ بھی دن تھے کہ تِری راج کماری میں تھی

درد کب تھا، وہ تِرے دل میں جنوں تھا میرا

اشک کب تھے وہ تِری آنکھ سے جاری میں تھی

یہ بھی سچ ہے کہ مجھے مار دیا ہے تُو نے

یہ بھی سچ ہے کہ تجھے جان سے پیاری میں تھی

ساری دنیا کو پتا ہے، کہ نہیں تم میرے

ساری دنیا کو پتا ہے کہ تمہاری میں تھی

مجھ کو دنیا نے قمرؔ بانٹنا چاہا، لیکن

جس طرف دل تھا ادھر ساری کی ساری میں تھی

ریحانہ قمر