مرتے ہیں ترے پیار سے ہم اور زیادہ

مرتے ہیں تِرے پیار سے ہم اور زیادہ

تُو لطف میں کرتا ہے ستم اور زیادہ

دے کیونکہ نہ وہ داغِ الم اور زیادہ

قیمت میں بڑھے دل کی درم اور زیادہ

ساتھ اپنے ہے اب فوجِ الم اور زیادہ

کر تُو بھی بلند آہ علم اور زیادہ

تیز اس نے جو کی تیغِ ستم اور زیادہ

مشتاقِ شہادت ہوئے ہم اور زیادہ

سر کٹ کے سرافراز ہیں ہم اور زیادہ

جوں شاخ بڑھے ہو کے قلم اور زیادہ

گھبرانا جو یاد آیا تیرا ہو کے ہم آغوش

گھبرانے لگا سینے میں دم اور زیادہ

وہ دل کو چرا کے جو لگے آنکھ چرانے

یاروں کا گیا ان پہ بھرم اور زیادہ

کرتی ہے مِری خاک جلا کر مجھے پامال

کیونکر نہ اٹھاوے وہ قدم ور زیادہ

آخر مئے عشق آنکھوں سے ٹپکائی کس نے

بھڑکے ہے جو یوں آتشِ غم اور زیادہ

کیوں میں نے کہا تجھ سا خدائی میں نہیں اور

مغرور ہوا اب وہ صنم اور زیادہ

کہتا ہے گلے لگ کے مِرے وہ دمِ خنجر

لے عشق کا بھر اس کے تُو دم اور زیادہ

جو کنجِ قناعت میں ہیں تقدیر پہ شاکر

ہے ذوقؔ برابر انہیں کم اور زیادہ

ابراہیم ذوق