تو کیا عجب کہ ہم ایسے بھی خوار ہونے لگے
بھلے بھلے یہاں رزقِ غبار ہونے لگے
ابھی تو رات کا پہلا پہر نہیں گزرا
ابھی سے دن کیلئے بے قرار ہونے لگے
خدا کا نام لینا بھی جنہیں گوارا نہیں
تلاشِ رزق یہ کن راستوں پہ لے آئی
اک ایک کر کے جدا سارے یار ہونے لگے
تجھے بھی چاہیے دلجوئی ان کی تھوڑی سی
نثار تجھ پہ جو پروانہ وار ہونے لگے
گزرنے لگتی ہیں کترا کے گردشیں ان سے
تِرے اسیروں میں جن کا شمار ہونے لگے
چھپا لیا ہے گھٹاؤں نے مِل کے سورج کو
ہوا کی رتھ پہ اندھیرے سوار ہونے لگے
مِری تو اپنے مسائل سے جنگ ہے واجدؔ
مِری بلا سے کوئی شہریار ہونے لگے
واجد امیر
No comments:
Post a Comment