تقدیر کے ماروں کی سمجھا نہ زباں کوئی

عارفانہ کلام حمد نعت منقبت 

تقدیر کے ماروں کی سمجھا نہ زباں کوئی

جیسے میرے آقاؐ ہیں ایسا ہے کہاں کوئی

آقاﷺ نے قناعت کی تاریخ بنا دی ہے 

فاقوں میں نہیں دیکھا سلطانِ جہاں کوئی

قرآن نے بتلایا رتبہ یہ شہیدوں کا 

ہو ہی نہیں سکتا ہے بے نام و نشاں کوئی

معراج کے عنواں سے معراج  کے حامل کی

وہ منزلِ رفعت ہے پہنچا نہ جہاں کوئی

یہ بات اگر ہے تو بس جانِ عطا میں ہے 

دشمن کو بھی دیتا ہے دنیا میں اماں کوئی

وہ رحمتِ عالم ہیں دنیا میں بجز ان کے

انساں کا غمِ پنہاں سمجھا نہ یہاں کوئی

آقاﷺ کے غلاموں کا انداز نرالا ہے

دنیا میں نہیں ایسا بے وہم و گماں کوئی 

اللہ کی قدرت ہی اس بات پہ قادر ہے

صحرا سے نکالے تو یوں آبِ رواں کوئی 

سرکارؐ کی عظمت کا احساس ابھرتا ہے 

توصیفِ پیمبرؐ جب کرتا ہے بیاں کوئی

نزدیک ہمارے ہیں جتنا کہ شہِ کونین 

دلشاد نہیں اتنا قربِ رگِ جاں کوئی

دلشاد گورکھپوری